سوال:
سلام۔ میرا سوال ہے کہ بچے کی پیدائش کے بعد ۴۰ دن پورے ہونے کے بعد جو غسل ہوتا ہے اس کا کیا طریقہ ہے اور اس کی کیا نیت ہوگی؟
جواب:
سلام علیکم و رحمۃ اللہ۔
بچہ جب پیدا ہوتا ہے تو اس وقت خاتون کے رحم سے خون نفاس جاری ہوتا ہے۔ خون نفاس کم سے کم ایک لحظے کے لیے جاری ہوتا ہے یا زیادہ سے زیادہ دس دن تک جاری رہتا ہے۔ مختلف خواتین میں اس کی مدت مختلف ہوسکتی ہے مثلا ایک خاتون کے لیے ممکن ہے بہت کم ہو مثلا ایک گھنٹہ ایک دن یا مثلا چار پانچ دن تک چلا جاۓ۔ اور کسی اور خاتون کے لیے نفاس کا خون دس دن تک مسلسل رہے۔
خون نفاس کے بارے میں یہ ہے کہ دس دن سے زیادہ نہیں آتا اس لیے اگر کوئی خاتون دس دن کے بعد کوئی خون دیکھے تو وہ نفاس کا خون نہیں ہوگا بلکہ کوئی اور خون ہوگا۔
جیسے ہی خون نفاس رک جاۓ خاتون کے لیے ضروری ہے کہ وہ غسل نفاس انجام دے اور اپنے واجبات نماز یا روزہ معمول کے مطابق انجام دے۔ مثلا اگر تین یا چار یا بالفرض سات یا آٹھ دن بعد خون نفاس آنا رک جاۓ تو اسی وقت خاتون پر ضروری ہے کہ غسل نفاس انجام دے اور عبادات انجام دینا اس پر واجب ہو جاۓ گا۔ خون نفاس رک جانے کے بعد خاتون کا غسل نہ کرنا اور عبادات کو ترک کرنا حرام ہے۔
یہ چالیس روز کی مدت نہیں معلوم کہاں سے ہمارے معاشرے میں رواج پا گئی شاید ہندؤوں کے ہاں سے ہمارے بڑوں نے اس کو رائج کیا۔ اسلام کے ہاں خاتون پر جیسے ہی نفاس رکے غسل کرنا واجب ہو جاتا ہے چالیس دن تک پلیدگی کی حالت میں رہنا نا صرف حرام ہے بلکہ خود ماں اور بچے کے لیے بھی مضر ہے۔
غسل نفاس عام غسلوں کی طرح انجام دیا جاتا ہے جیسے غسل جنابت انجام دیتے ہیں صرف نیت تبدیل کرے گی۔ مثلا کہے گی کہ غسل نفاس کرتی ہوں قربتا الی اللہ۔
منابع:
۱۔ آفیشل ویب سائٹ رہبر معظم۔
۲۔ آفیشل ویب سائٹ آیت اللہ سیستانی۔
