نہج البلاغہ خطبہ ۷۱

قَالَهٗ لِمَرْوَانَ بْنِ الْحَکَمِ بِالْبَصْرَةِ قَالُوْا: اُخِذَ مَرْوَانُ بْنُ الْحَکَمِ اَسِیْرًا یَّوْمَ الْجَمَلِ، فَاسْتَشْفَعَ الْحَسَنَ وَ الْحُسَیْنَ عَلَیْھِمَا السَّلَامُ اِلٰۤى اَمِیْرِ الْمُؤْمِنِیْنَ ؑ فَکَلَّمَاهُ فِیْهِ فَخَلّٰى سَبِیْلَهٗ: فَقَالَا لَهٗ یُبَایِعُکَ یَاۤ اَمِیْرَ الْمُؤْمِنِیْنَ، فَقَالَ ؑ:

جمل کے موقعہ پر جب مروان بن حکم گرفتار کیا گیا تو اس نے حسن اور حسین علیہما السلام سے خواہش کی کہ وہ امیر المومنین علیہ السلام سے اس کی سفارش کریں۔ چنانچہ ان دونوں حضراتؑ نے امیر المومنینؑ سے اس سلسلہ میں بات چیت کی اور حضرتؑ نے اُسے رہا کر دیا۔ پھر دونوں شہزادوں نے کہا کہ: یا امیر المومنینؑ! یہ آپؑ کی بیعت کرنا چاہتا ہے، تو حضرت علی علیہ السلام نے اس کے متعلق فرمایا:

اَ وَ لَمْ یُبَایِعْنِیْ بَعْدَ قَتْلِ عُثْمَانَ؟ لَا حَاجَةَ لِیْ فِیْ بَیْعَتِهٖ! اِنَّهَا کَفٌّ یَّهُوْدِیَّةٌ، لَوْ بَایَعَنِیْ بِکَفِّهٖ لَغَدَرَ بِسَبَّتِهٖ. اَمَا اِنَّ لَهٗ اِمْرَةً کَلَعْقَةِ الْکَلْبِ اَنْفَهٗ، وَ هُوَ اَبُو الْاَکْبُشِ الْاَرْبَعَةِ، وَ سَتَلْقَی الْاُمَّةُ مِنْهُ وَ مِنْ وَّلَدِهٖ یَوْمًا اَحْمَرَ!.

کیا اس نے عثمان کے قتل ہو جانے کے بعد میری بیعت نہیں کی تھی؟ اب مجھے اس کی بیعت کی ضرورت نہیں۔ یہ یہودی قسم کا ہاتھ ہے۔ اگر ہاتھ سے بیعت کرے گا تو ذلیل طریقے سے توڑ بھی دے گا۔ تمہیں معلوم ہونا چاہیے کہ یہ بھی اتنی دیر کہ کتا اپنی ناک چاٹنے سے فارغ ہو، حکومت کرے گا اور اس کے چار بیٹے بھی حکمران ہوں گے اور اُمت اس کے اور اس کے بیٹوں کے ہاتھوں سے سختیوں کے دن دیکھے گی۔

---

’’مروان ابن حکم‘‘ حضرت عثمان کا بھتیجا اور داماد تھا اور اکہرا جسم اور لمبا قد ہونے کی وجہ سے ’’خیط باطل‘‘ (باطل کا ڈورا) کے لقب سے یاد کیا جاتا تھا چنانچہ عبد الملک ابن مروان نے جب عمرو ابن سعید اشدق کو قتل کر دیا تو اس کے بھائی یحییٰ ابن سعید نے کہا:

غَدَرْتُمْ بِعَمْرٍو یَا بَنِیْ خَیْطِ بَاطِلٍ

وَ مِثْلُکُمْ یَبْنِی الْبُیوْتَ عَلى الْغَدَرِ

’’اے خیطِ باطل کی اولاد! تم نے عمرو سے غداری کی اور تمہارے ایسے لوگ غداری ہی کی بنیادوں پر اپنے اقتدار کی عمارتیں کھڑی کیا کرتے ہیں‘‘۔(۱)

اس کا باپ ’’حکم‘‘ گو فتح مکہ کے موقعہ پر اسلام لے آیا تھا مگر اس کے طور طریقے ایسے تھے کہ جو پیغمبر ﷺ کیلئے انتہائی اذیت کا باعث ہوتے تھے۔ چنانچہ پیغمبر ﷺ نے اس پر اور اس کی اولاد پر لعنت کی اور فرمایا کہ:

وَیْلٌ لِاُمَّتِیْ مِنْ صُلْبِ هذَا.

یعنی اس کی اولاد کے ہاتھوں میری اُمت تباہی کے دن دیکھے گی۔ (اسد الغابہ)

آخر پیغمبر ﷺ نے اس کی بڑھتی ہوئی سازشوں کے پیش نظر اسے مدینہ سے وادی وج (طائف میں ایک جگہ ہے) کی طرف نکلوا دیا اور مروان بھی اس کے ساتھ چلتا بنا اور پھر پیغمبر ﷺ نے زندگی بھر ان دونوں کو مدینہ نہ آنے دیا۔ حضرت ابو بکر اور حضرت عمر نے بھی ایسا ہی کیا، لیکن حضرت عثمان نے اپنے عہد میں ان دونوں کو واپس بلوا لیا اور مروان کو تو اس عروج پر پہنچایا کہ گویا خلافت کی باگ ڈور اسی کے ہاتھ میں ہے اور پھر اس کے حالات اس طرح سازگار ہوئے کہ معاویہ ابن یزید کے مرنے کے بعد خلیفۃ المسلمین بن گیا، لیکن ابھی نو مہینے اٹھارہ دن ہی حکومت کرتے ہوئے گزرے تھے کہ ۳ رمضان سن ۶۵ ہجری میں ۶۳ برس کی عمر میں قضا نے اس طرح آ گھیرا کہ اس کی بیوی اس کے منہ پر تکیہ رکھ کر بیٹھ گئی اور اُس وقت تک الگ نہ ہوئی جب تک اُس نے دم نہ توڑ دیا۔

اس کے جن چار بیٹوں کی طرف امیر المومنین علیہ السلام نے اشارہ کیا ہے وہ عبد الملک ابنِ مروان کے چار بیٹے: ولید، سلیمان، یزید اور ہشام ہیں کہ جو عبد الملک کے بعد یکے بعد دیگرے تخت خلافت پر بیٹھے اور اپنی خونچکاں داستانوں سے صفحاتِ تاریخ رنگین کر گئے۔

اور بعض شارحین نے خود اس کے صلبی بیٹے مراد لئے ہیں جن کے نام یہ ہیں: عبد الملک، عبد العزیز، بشر اور محمد۔ ان میں سے عبدالملک تو خلیفہ ہو گیا اور عبد العزیز مصر کا، بشر عراق کا اور محمد جزیرہ کا والی قرار پایا۔

[۱]۔ الاوائل، ابو ہلال العسکری، ج ۱، ص ۲۴۹، مطبوعہ دار البشیر، طنطہ، ۱۴۰۸ ھ۔

---

balagha.org

نہج البلاغہ خطبہ ۷۰

عَلَّمَ فِیْهَا النَّاسَ الصَّلَاةَ عَلَى النَّبِیِّ ﷺ

اس میں آپؑ نے لوگوں کو پیغمبر ﷺ پر صلوات بھیجنے کا طریقہ بتایا ہے

اَللّٰهُمَّ دَاحِیَ الْمَدْحُوَّاتِ، وَ دَاعِمَ الْمَسْمُوْکَاتِ، وَ جَابِلَ الْقُلُوْبِ عَلٰی فِطْرَتِهَا: شَقِیِّهَا وَ سَعِیْدِهَا، اجْعَلْ شَرَآئِفَ صَلَوَاتِکَ، وَ نَوَامِیَ بَرَکَاتِکَ، عَلٰی مُحَمَّدٍ عَبْدِکَ وَ رَسُوْلِکَ، الْخَاتِمِ لِمَا سَبَقَ، وَ الْفَاتِحِ لِمَا انْغَلَقَ، وَ الْمُعْلِنِ الْحَقَّ بِالْحَقِّ، وَ الدَّافِعِ جَیْشَاتِ الْاَبَاطِیْلِ، وَ الدَّامِغِ صَوْلَاتِ الْاَضَالِیْلِ۔

اے اللہ! اے فرش زمین کے بچھانے والے اور بلند آسمانوں کو (بغیر سہارے کے) روکنے والے! دلوں کو اچھی اور بُری فطرت پر پیدا کرنے والے! اپنی پاکیزہ رحمتیں اور بڑھنے والی برکتیں قرار دے اپنے عبد اور رسول محمد ﷺ کیلئے جو پہلی (نبوتوں کے) ختم کرنے والے اور بند (دل) کھولنے والے اور حق کے زور سے اعلانِ حق کرنے والے، باطل کی طغیانیوں کو دبانے والے اور ضلالت کے حملوں کو کچلنے والے تھے۔

کَمَا حُمِّلَ فَاضْطَلَعَ قَآئِمًۢا بِاَمْرِکَ، مُسْتَوْفِزًا فِیْ مَرْضَاتِکَ، غَیْرَ نَاکِلٍ عَنْ قُدُمٍ، وَ لَا وَاهٍ فِیْ عَزْمٍ، وَاعِیًا لِّوَحْیِکَ، حَافِظًا لِّعَهْدِکَ، مَاضِیًا عَلٰی نَفَاذِ اَمْرِکَ حَتّٰۤی اَوْرٰی قَبَسَ الْقَابِسِ، وَ اَضَآءَ الطَّرِیْقَ لِلْخَابِطِ، وَ هُدِیَتْ بِهِ الْقُلُوْبُ بَعْدَ خَوْضَاتِ الْفِتَنِ وَ الْاٰثَامِ، وَ اَقَامَ مُوْضِحَاتِ الْاَعْلَامِ وَ نَیِّرَاتِ الْاَحْکَامِ، فَهُوَ اَمِیْنُکَ الْمَاْمُوْنُ، وَ خَازِنُ عِلْمِکَ الْمَخْزُوْنِ، وَ شَهِیْدُکَ یَوْمَ الدِّیْنِ، وَ بَعِیْثُکَ بِالْحَقِّ، وَ رَسُوْلُکَ اِلَی الْخَلْقِ.

جیسا ان پر (ذمہ داری کا) بوجھ عائد کیا گیا تھا اس کو انہوں نے اٹھایا، (تیرے امر کے ساتھ قیام کیا) اور تیری خوشنودیوں کی طرف بڑھنے کیلئے مضبوطی سے جم کر کھڑے ہو گئے۔ نہ آگے بڑھنے سے منہ موڑا، نہ ارادے میں کمزوری کو راہ دی۔ وہ تیری وحی کے حافظ اور تیرے پیمان کے محافظ تھے اور تیرے حکموں کے پھیلانے کی دھن میں لگے رہنے والے تھے۔ یہاں تک کہ انہوں نے روشنی ڈھونڈنے والے کیلئے شعلے بھڑکا دیئے اور اندھیرے میں بھٹکنے والے کیلئے راستہ روشن کر دیا۔ فتنوں فسادوں میں سر گرمیوں کے بعد دلوں نے آپؐ کی وجہ سے ہدایت پائی۔ انہوں نے راہ دکھانے والے نشانات قائم کئے، روشن و تابندہ احکام جاری کئے۔ وہ تیرے امین، معتمد اور تیرے علم مخفی کے خزینہ دار تھے اور قیامت کے دن تیرے گواہ اور تیرے پیغمبر برحق اور خلق کی طرف فرستادہ رسول تھے۔

اَللّٰهُمَّ افْسَحْ لَهٗ مَفْسَحًا فِیْ ظِلِّکَ، وَ اجْزِهٖ مُضَاعَفَاتِ الْخَیْرِ مِنْ فَضْلِکَ.

خدایا! ان کی منزل کو اپنے زیر سایہ وسیع و کشادہ بنا اور اپنے فضل سے انہیں دہرے حسنات عطا کر۔

اَللّٰہُمَّ اَعْلِ عَلٰی بِنَآءِ الْبَانِیْنَ بِنَآئَهٗ، وَ اَکْرِمْ لَدَیْکَ مَنْزِلَـتَهٗ، وَ اَتْمِمْ لَهٗ نُوْرَهٗ، وَ اجْزِهٖ مِنِ ابْتِعَاثِکَ لَهٗ مَقبُوْلَ الشَّهَادَةِ، مَرْضِیَّ الْمَقَالَةِ، ذَا مَنْطِقٍ عَدْلٍ، وَ خُطَّةٍ فَصْلٍ.

خداوندا! تمام بنیاد قائم کرنے والوں کی عمارت پر ان کی بنا کردہ عمارت کو فوقیت عطا کر اور انہیں با عزت مرتبے سے سرفراز کر اور ان کے نور کو پورا پورا فروغ دے اور انہیں رسالت کے صلہ میں شہادت کی قبولیت و پذیرائی اور قول و سخن کی پسندیدگی عطا کر۔ جب کہ آپؐ کی باتیں سراپا عدل اور فیصلے حق و باطل کو چھانٹنے والے ہیں۔

اَللّٰهُمَّ اجْمَعْ بَیْنَنَا وَ بَیْنَهٗ فِیْ بَرْدِ الْعَیْشِ، وَ قَرَارِ النِّعْمَةِ، وَ مُنَی الشَّهَوَاتِ، وَ اَهْوَآءِ اللَّذَّاتِ. وَ رَخَآءِ الدَّعَةِ وَ مُنْتَهَی الطُّمَاْنِیْنَةِ، وَ تُحَفِ الْکَرَامَةِ.

اے اللہ! ہمیں بھی ان کے ساتھ خوشگوار و پاکیزہ زندگی اور منزلِ نعمات میں یکجا کر اور مرغوب و دل پسند خواہشوں اور لذتوں اور آسائش و فارغ البالی اور شرف و کرامت کے تحفوں میں شریک بنا۔

---

balagha.org

نہج البلاغہ خطبہ ۶۹

فِیْ ذَمِّ اَهْلِ الْعِرَاقِ

اہل عراق کی مذمت میں فرمایا

اَمَّا بَعْدُ، یَاۤ اَهْلَ الْعِرَاقِ! فَاِنَّمَا اَنْتُمْ کَالْمَرْاَةِ الْحَامِلِ، حَمَلَتْ فَلَمَّا اَتَمَّتْ اَمْلَصَتْ، وَ مَاتَ قَیِّمُهَا، وَ طَالَ تَاَیُّمُهَا، وَ وَرِثَهَا اَبْعَدُهَا.

اے اہل عراق! تم اس حاملہ عورت کے مانند ہو جو حاملہ ہونے کے بعد جب حمل کے دن پورے کرے تو مرا ہوا بچہ گرا دے اور اس کا شوہر بھی مر چکا ہو اور رنڈاپے کی مدت بھی دراز ہو چکی ہو اور (قریبی نہ ہونے کی وجہ سے) دور کے عزیز ہی اس کے وارث ہوں۔

اَمَا وَاللهِ! مَاۤ اَتَیْتُکُمُ اخْتِیَارًا، وَ لٰکِنْ جِئْتُ اِلَیْکُمْ سَوْقًا، وَ لَقَدْ بَلَغَنِیْۤ اَنَّکُمْ تَقُوْلُوْنَ: عَلِیٌّ یَّکْذِبُ، قَاتَلَکُمُ اللهُ! فَعَلٰی مَنْ اَکْذِبُ؟ اَ عَلَی اللهِ؟ فَاَنَا اَوَّلُ مَنْ اٰمَنَ بِهٖ! اَمْ عَلٰی نَبِیِّهٖ؟ فَاَنَا اَوَّلُ مَنْ صَدَّقَهٗ! کَلَّا وَ اللهِ! وَ لٰکِنَّهَا لَهْجَةٌ غِبْتُمْ عَنْهَا، وَ لَمْ تَکُوْنُوْا مِنْ اَهْلِهَا، وَیْلُمِّهٖ، کَیْلًۢا بِغَیْرِ ثَمَنٍ! لَوْ کَانَ لَهٗ وِعَآءٌ، ﴿وَ لَتَعْلَمُنَّ نَبَاَهٗ بَعْدَ حِیْنٍ﴾.

بخدا! میں تمہاری طرف بخوشی نہیں آیا، بلکہ حالات سے مجبور ہو کر آ گیا۔ مجھے یہ خبر پہنچی ہے کہ تم کہتے ہو کہ: علیؑ کذب بیانی کرتے ہیں۔ خدا تمہیں ہلاک کرے! (بتاؤ) میں کس پر جھوٹ باندھ سکتا ہوں؟ کیا اللہ پر؟ تو میں سب سے پہلے اس پر ایمان لانے والا ہوں، یا اس کے نبیؐ پر؟ تو میں سب سے پہلے ان کی تصدیق کرنے والا ہوں۔ خدا کی قسم! ایسا ہرگز نہیں! بلکہ وہ ایک ایسا اندازِ کلام تھا جو تمہارے سمجھنے کا نہ تھا اور نہ تم میں اس کے سمجھنے کی اہلیت تھی۔ خدا تمہیں سمجھے! میں تو بغیر کسی عوض کے (علمی جواہر ریزے) ناپ ناپ کر دے رہا ہوں۔ کاش کہ ان کیلئے کسی کے ظرف میں سمائی ہوتی۔ ’’(ٹھہرو) کچھ دیر بعد تم بھی اس کی حقیقت کو جان لو گے‘‘۔

---

تحکیم کے بعد جب عراقیوں نے معاویہ کے تابڑ توڑ حملوں کا جواب دینے میں سستی و بد دلی کا مظاہرہ کیا تو ان کی مذمت و توبیخ کے سلسلے میں یہ خطبہ ارشاد فرمایا جس میں صفین کے موقعہ پر ان کی فریب خوردگی اور جنگ سے دستبرداری کی طرف اشارہ کیا ہے اور ان کی حالت کو اس عورت سے تشبیہ دی ہے جس میں یہ پانچ وصف ہوں:

۱۔ وہ حاملہ ہو:

اس سے مراد یہ ہے کہ یہ لوگ لڑنے بھڑنے کی پوری پوری صلاحیت و استعداد رکھتے تھے۔ اس بانجھ عورت کے مانند نہ تھے کہ جس سے کوئی امید نہیں رکھی جا سکتی۔

۲۔ مدت حمل پوری کر چکی ہو:

یعنی تمام کٹھن اور دشوار گزار منزلوں کو طے کر کے فتح و کامرانی کے قریب پہنچ چکے تھے۔

۳۔ از خود حمل کو ساقط کر دیا ہو:

یعنی فتح کے قریب پہنچ کر صلح پر اتر آئے اور دامن مراد بھرنے کے بجائے نامرادیوں کو سمیٹ لیا۔

۴۔ اس کے رنڈاپے کی مدت دراز ہو:

یعنی ان کی حالت ایسی ہو گئی جیسے ان کا کوئی سرپرست و نگران نہ ہو اور وہ بے والی و وارث بھٹک رہے ہوں۔

۵۔ بیگانے اس کے وارث ہوں:

یعنی اہلِ شام ان کے املاک پر قبضہ و تسلط جما رہے ہیں کہ جو ان سے کوئی لگاؤ نہیں رکھتے۔

---

balagha.org

نہج البلاغہ خطبہ ۶۸

فِی سُحْرَةِ الْیَوْمِ الَّذِی ضُرِبَ فِیهِ

آپؑ نے یہ کلام شبِ ضربت کی سحر کو فرمایا

مَلَکَتْنِیْ عَیْنِیْ وَ اَنَا جَالِسٌ، فَسَنَحَ لِیْ رَسُوْلُ اللهِ ﷺ: فَقُلْتُ یَا رَسُوْلَ اللهِ! مَاذَا لَقِیْتُ مِنْ اُمَّتِکَ مِنَ الْاَوَدِ وَ اللَّدَدِ؟ فَقَالَ: «ادْعُ عَلَیْهِمْ»، فَقُلْتُ: اَبْدَلَنِی اللهُ بِهِمْ خَیْرًا مِّنْهُمْ، وَ اَبْدَلَهُمْ بِیْ شَرًّا لَّهُمْ مِنِّیْ.

میں بیٹھا ہوا تھا کہ میری آنکھ لگ گئی۔ اتنے میں رسول اللہ ﷺ میرے سامنے جلوہ فرما ہوئے۔ میں نے کہا: یا رسول اللہؐ! مجھے آپؐ کی اُمت کے ہاتھوں کیسی کیسی کجرویوں اور دشمنیوں سے دو چار ہونا پڑا ہے۔ تو رسول اللہ ﷺ نے فرمایا کہ: «تم ان کیلئے بد دُعا کرو»، تو میں نے (صرف اتنا) کہا کہ: اللہ مجھے ان کے بدلے میں ان سے اچھے لوگ عطا کرے اور ان کو میرے بدلے میں کوئی بُرا (امیر) دے۔

---

balagha.org

نہج البلاغہ خطبہ ۶۷

فِىْ ذَمِّ اَصْحَابِهٖ

اپنے اصحاب کی مذّمت میں فرمایا

کَمْ اُدَارِیْکُمْ کَمَا تُدَارَی الْبِکَارُ الْعَمِدَةُ، وَ الثِّیَابُ الْمُتَدَاعِیَةُ! کُلَّمَا حِیْصَتْ مِنْ جَانِبٍ تَهَتَّکَتْ مِنْ اٰخَرَ، کُلَّمَا اَطَلَّ عَلَیْکُمْ مَنْسِرٌ مِّنْ مَّنَاسِرِ اَهْلِ الشَّامِ اَغْلَقَ کُلُّ رَجُلٍ مِّنْکُمْ بَابَهٗ، وَ انْجَحَرَ انْجِحَارَ الضَّبَّةِ فِیْ جُحْرِهَا، وَ الضَّبُعِ فِیْ وِجَارِهَا.

کب تک میں تمہارے ساتھ ایسی نرمی اور رو رعایت کرتا رہوں گا جیسی ان اونٹوں سے کی جاتی ہے جن کی کوہانیں اندر سے کھوکھلی ہو چکی ہوں اور ان پھٹے پرانے کپڑوں سے کہ جنہیں ایک طرف سے سیا جائے تو دوسری طرف سے پھٹ جاتے ہیں۔ جب بھی شامیوں کے ہر اول دستوں میں سے کوئی دستہ تم پر منڈلاتا ہے تو تم سب کے سب (اپنے گھروں) کے دروازے بند کر لیتے ہو اور اس طرح اندر دبک جاتے ہو جس طرح گوہ اپنے سوراخ میں اور بجو اپنے بھٹ میں۔

الذَّلِیْلُ وَاللهِ! مَنْ نَّصَرْتُمُوْهُ! وَ مَنْ رُّمِیَ بِکُمْ فَقَدْ رُمِیَ بِاَفْوَقَ نَاصِلٍ. وَ اِنَّکُمْ ـ وَاللهِ ـ لَکَثِیْرٌ فِی الْبَاحَاتِ، قَلِیْلٌ تَحْتَ الرَّایَاتِ، وَ اِنِّیْ لَعَالِمٌۢ بِمَا یُصْلِحُکُمْ، وَ یُقِیْمُ اَوَدَکُمْ، وَ لٰکِنِّیْ لَاۤ اَ رٰۤی اِصْلَاحَکُمْ بِاِفْسَادِ نَفْسِیْ.

جس کے تمہارے ایسے مدد گار ہوں اسے تو ذلیل ہی ہونا ہے اور جس پر تم (تیر کی طرح) پھینکے جاؤ تو گویا اس پر ایسا تیر پھینکا گیا جس کا سوفار بھی شکستہ اور پیکان بھی ٹوٹا ہوا ہے۔ خدا کی قسم! (گھروں کے) صحن میں تو تم بڑی تعداد میں نظر آتے ہو، لیکن جھنڈوں کے نیچے تھوڑے سے۔ میں اچھی طرح جانتا ہوں کہ کس چیز سے تمہاری اصلاح اور کس چیز سے تمہاری کجروی کو دور کیا جا سکتا ہے، لیکن میں اپنے نفس کو بگاڑ کر تمہاری اصلاح کرنا نہیں چاہتا۔

اَضْرَعَ اللهُ خُدُوْدَکُمْ، وَ اَتْعَسَ جُدُوْدَکُمْ! لَا تَعْرِفُوْنَ الْحَقَّ کَمَعْرِفَتِکُمُ الْبَاطِلَ،وَ لَا تُبْطِلُوْنَ الْبَاطِلَ کَاِبْطَالِکُمُ الْحَقَّ!.

خدا تمہارے چہروں کو بے آبرو کرے اور تمہیں بد نصیب کرے۔ جیسی تم باطل سے شناسائی رکھتے ہو ویسی حق سے تمہاری جان پہچان نہیں اور جتنا حق کو مٹاتے ہو باطل اتنا تم سے نہیں دبایا جاتا۔

---

balagha.org