نہج البلاغہ مکتوب ۶۱

اِلٰى کُمَیْلِ بْنِ زِیَادٍ النَّخَعِىِّ، وَ هُوَ عَامِلُهٗ عَلٰى هِیْتٍ، یُنْکِرُ عَلَیْهِ تَرْکَهٗ دَفْعَ مَنْ یَّجْتَازُ بِهٖ مِنْ جَیْشِ الْعَدُوِّ طَالِبًا لِّلْغَارَةِ:

والی ہیت کمیل ابن زیاد نحعی کے نام۔ اس میں ان کے اس طرز عمل پر ناپسندیدگی کا اظہار فرمایا ہے کہ جب دشمن کی فوجیں لوٹ مار کے قصد سے ان کے علاقہ کی طرف سے گزریں تو انہوں نے ان کو روکا نہیں۔

اَمَّا بَعْدُ! فَاِنَّ تَضْیِیْعَ الْمَرْءِ مَا وُلِّیَ وَ تَکَلُّفَهٗ مَا کُفِیَ، لَعَجْزٌ حَاضِرٌ وَّ رَاْیٌ مُّتَبَّرٌ، وَ اِنَّ تَعَاطِیَکَ الْغَارَةَ عَلٰۤى اَهْلِ قِرْقِیْسِیَا، وَ تَعْطِیْلَکَ مَسَالِحَکَ الَّتِیْ وَلَّیْنَاکَ، لَیْسَ بِهَا مَنْ یَّمْنَعُهَا، وَ لَا یَرُدُّ الْجَیْشَ عَنْهَا لَرَاْیٌ شَعَاعٌ، فَقَدْ صِرْتَ جِسْرًا لِّمَنْ اَرَادَ الْغَارَةَ مِنْ اَعْدَآئِکَ عَلٰۤى اَوْلِیَآئِکَ، غَیْرَ شَدِیْدِ الْمَنْکِبِ، وَ لَا مَهِیْبِ الْجَانِبِ، وَ لَا سَادٍّ ثُغْرَةً، وَ لَا کَاسِرٍ شَوْکَةً، وَ لَا مُغْنٍ عَنْ اَهْلِ مِصْرِهٖ، وَ لَا مُجْزٍ عَنْ اَمِیْرِهٖ.

آدمی کا اس کام کو نظر انداز کر دینا کہ جو اسے سپرد کیا گیا ہے اور جو کام اس کے بجائے دوسروں سے متعلق ہے اس میں خواہ مخواہ کو گھسنا ایک کھلی ہوئی کمزوری اور تباہ کن فکر ہے۔ تمہارا اہل قرقیسیا پر دھاوا بول دینا اور اپنی سرحدوں کو خالی چھوڑ دینا جبکہ وہاں نہ کوئی حفاظت کرنے والا ہے نہ دشمن کی سپاہ کو روکنے والا ہے، ایک پریشان خیالی کا مظاہرہ تھا۔ اس طرح تم اپنے دشمنوں کیلئے پل بن گئے جو تمہارے دوستوں پر حملہ آور ہونے کا ارادہ رکھتے ہوں، اس عالم میں کہ نہ تمہارے بازوؤں میں توانائی ہے، نہ تمہارا کچھ رعب و دبدبہ ہے، نہ تم دشمن کا راستہ روکنے والے ہو، نہ اس کا زور توڑنے والے ہو، نہ اپنے شہر والوں کے کام آنے والے ہو اور نہ اپنے امیر کی طرف سے کوئی کام انجام دینے والے ہو۔

https://balagha.org